Como sabedes, o Concello de Caldas de Reis anunciou que os concertos do Festival Cultura Quente non se celebrarán este ano.
A razón máis poderosa para tomar esta decisión foi a de preservar o espírito e a calidade do festival, despois puideron outras grandes razóns como a sensatez nun período de grandes cambios.
Até o último momento estivéronse barallando todas as posibilidades para manter este gran soño que xurdiu fai catorce anos e que era o de facer de Caldas un punto de encontro, organizar un evento cultural de gran nivel e, en definitiva, crear un proxecto de desenvolvemento local.
Desde aquí o noso recoñecemento a todas as personas e entidades que ano tras ano veñen apostando e traballando polo festival; a todas as que se acercaron a Caldas e sentiron os “vatios termais” da Carballeira; a todos os artistas e músicos (os grandes e os moi grandes) e tamén aos medios de comunicación e revistas especializadas. Grazas a todos eles por seguir facendo do festival Cultura Quente un punto de encontro dos máis importantes do país.
Poucos movementos ou organizacións se poden preciar de teren o respaldo de tanta intelixencia, arte e solidaridade; o de tantas persoas que saben ver xigantes onde outros só ven muiños.

O obxectivo da organización xa está posto nos concertos de Cultura Quente  2013, e a temperatura en Caldas está no mellor grado de ebullición.